هاي الصورة مش بأوروبا ولا ببلد اجنبي هاي ببلد عربي وبلد المسلمين!
صورة من الباص السريع إلي الكل بتفتخر بنجاحه...
قبل سنة ونص لما كنت بتركيا وشفت كيف الباص كيف الشباب والبنات واقفين وفي ازدحام كبير والواقف أكتر من القاعد قديه كنت فخورة أنه أنا ببلد عربي وعنا بحترموا البنت وم بعمرنا سمعنا أنه في بنت طلعت بباص وضلت واقفة...
وهالصورة بعد سنة ونص بالزبط لأ و ببلد عربي ومسلم ....
كلنا فرحنا بس اطلقوا فكرة(الباص السريع) إلي ع أساس تحل أزمة عمان ، ترا الباص م حل مشكلة وبالعكس هوه تسبب بمشاكل كتيرة وهالشي حيكون سبب في زيادة نسب التحرش في المواصلات هاد غير عن أنه صرنا م بنختلف عن الغرب بشي...
بما أنه تم اقتراح مشروع متل مشروع الباص السريع فليه من الأساس تم انشاؤه على أساس تكون فيه المساحة الفاضية اكتر من المساحة إلي فيها مقاعد؟
طيب جد ليه أنا دافع متلي متل إلي قاعد وأنا أضل واقف وهوه قاعد؟
ياريت كلنا نطالب بمنع وجود أي راكب واقف في الباصات ومتل ما بتم مخالفة سائقي باصات الكوستر يتم مخالفة سائقي الباص السريع...
وطبعاً أنا ضد فكرة أنه البنت قاعدة والشب يضل واقف لأنه متل م البنت دافعة هوه دافع ومتل م هيه مروحة من الجامعة أو الشغل تعبانة وحتى هوه تعبان فأكيد مش هاد الحل؛ الحل أنه يتم وضع قوانين صارمة بخص النقل وفرض مخالفات على السائقين إلي بطلعوا عدد زيادة.
